一曲《囍帖街》為謝安琪（Kay）帶來名利和獎項，但隨之接着下來的是為期一年半仍未完結的負面新聞。經歷過一場又一場的大風雨，Kay希望重過以前的簡單生活，正如她早前所發出的聲明中所講的心願，只希望日後安靜地做音樂。幸好在這段日子內，Kay身邊有一位EQ甚高的另一半張繼聰，加上家人的支持，令她可以放心地唱下去。 撰文：李珮洳
謝安琪出道時只是一間蚊型唱片公司旗下的歌手，其後她的歌曲開始受到大家注意，後來更加入了大唱片公司，事業可謂一帆風順。直至一曲《囍帖街》令她走紅，於各大頒獎禮上囊括不少獎項，但本來平坦的路途忽然變成一個險要的斜坡，十分難行。
戥老公唔抵
迄今已有一年半的時間，Kay不斷受負面新聞困擾，問她有關被指整容、走音以及與陳奕迅（Eason）的緋聞，哪一樣令她感到最難堪？她日前接受本報記者專訪時笑說：「件件都咁難頂，總之唔係事實嘅嘢就難頂，所有嘢都係捏造出嚟嘅。如果呢啲新聞係針對個人嘅，我都話可以獨力承擔，但係牽涉到其他人，或者係旁敲側擊中傷我身邊嘅人，先至令到我最唔開心。」
Kay指老公張繼聰從來沒有為任何一宗新聞而感到不快，反而她會替另一半被中傷或者冠以貶義的稱號而感到不值，她說：「發生咁多事，阿聰係最唔嬲嘅一個，身邊嘅朋友就最大反應，我知道屋企人暗中都承受咗唔少輿論壓力。好似有一日阿媽都問我有冇辦法可以搞搞佢，等我唔好再俾人係咁寫，我聽到佢咁問就知道佢應該聽到唔少說話。好彩我所有屋企人同朋友都好支持我。」
其實阿Kay曾想過訴諸法律行動，不過後來知道要花很多時間及金錢，加上最後的結局極可能是勞民傷財，故此打消這念頭，她說：「做唱片行業邊有咁多錢去打官司呀，如果要告嘅話，單單係書信上面嘅來回都要搞一兩年，就算勝訴，我估都冇人記得之前發生乜嘢事，贏就係贏咗精神聲譽，成件事好似變得冇意思。」
曾想過唔唱
阿Kay揚言不時閃過退出的念頭，因她覺得怎樣做都會有人批評，她試過氣餒、意志消沉，但一想到可做自己喜愛的事作為事業，便繼續唱下去，她說：「呢啲壓力唔係咁易應付，我真係成日閃過唔唱o架，不過又唔想放棄自己嘅夢想。」
Kay更因張繼聰的一番說話，改變了悲觀的看法，她說：「佢話以後見到啲記者朋友都會同佢哋講，佢哋所寫嘅文字都係好有用，如果一個小朋友由5歲就睇一啲歪理，睇到20歲佢嘅價值觀會變成點呀？阿聰希望同大家講真實嘅事可以感動到人，唔一定係虛構嘅衰角色先至係好睇嘅故事，我聽完佢咁講，我都會學佢咁做。」
慢活對抗負能量
謝安琪的唱片《Slowness》就是想帶出面對一些儘管不合理的事、面對槍林彈雨的環境，都要以一個緩慢從容的態度解決，她說：「名同利對我唔係最重要，生活上仲有好多嘢係值得大家去珍惜，好似懶吓床呢啲細節都係一種福份。」
Kay續說：「呢隻碟我好想話畀大家聽，就算個世界點兵慌馬亂，只要你慢慢感受你身邊嘅人同事，珍惜你擁有嘅一切，面前嗰啲負能量始終都會離你而去。」
化妝：Johnathan.YofMake360.com.hk
髮型：DerrickNgofP.O.PHairdressing
服裝提供：BeyondTheValley,DayDream
場地提供：LaBrasserie（香港港威酒店）