「吓？真係要食o架？唔係影張相就得啦咩？」「當然唔係啦！我係專業嘅記者，為求真實一定要堅食，你都係專業嘅model呀呵？」就這樣大好少女，在本人的淫威之下……唔係，係專業精神之下至啱，被迫硬食……蝙蝠！
記者、攝影：曾冠輝
模特兒：ParisChan@PureModels
鳴謝：康泰旅行社、PTNewPlaceTour&Travel、IndonesiaKartikaAirlines
炸蕉一梳唔該！
嚟到印尼美娜多，一班行家日日酒店自助餐，食到嚡口嚡面：「乜印尼嘢淨係得沙嗲串燒炒飯加蛋加蝦片咋？」唔信！地道印尼人應該唔止得呢幾味，我們誓要走出酒店落入民間，不怕簡陋地踎，找尋美娜多最地道的印尼菜！第一站，我們走入市中心一列平靜民居之中，找到一個醒目招牌「DeTe」，以為是食「Tea」的地方。入內是個陰暗的空間，木板屋頂之下沒有燈光，店面整齊橫放幾張椅桌，加部電視已是餐廳的全部，有一種村落小店的風味。餐牌上一字一詞都是印尼語，識發音已經好叻，唔好話睇得明，請侍應推介吧：「我們平日食啲乜？我怕你食唔慣喎……試吓呢幾個吧！」第一個上枱的是Tinutuan（都話識讀已好叻！）狀似粥但呈橙色，外表……衰啲講其實似嘔吐物：「這是我們午餐常吃的，用米、粟米、番薯加幾種本地菜煮成……好食o架！」粥入口有淡淡番薯甜香，質地黏稠，好吃嗎？沒外表一般難以接受吧！緊接是PisangGoreng，一排排金黃色炸得似排骨，掰開透露一截蒼白，原來是炸香蕉，切片一排三片黏着一起炸，咬落外脆內軟帶淡淡蕉香，模特兒Paris連吞兩「梳」。蕉不膩，卻飽肚，兩三「梳」下來已見飽，最後一道EsKacangSusu原來是甜品：刨冰，朱古力奶淋上冰碎，底藏紅腰豆、紅豆，一道凉意自口腔滑到腸胃，化解一時暑氣。
a.DeTe：Jl.Wakekeno.8,Manado
有翼老鼠養顏？
「炸蕉刨冰唔算好特別咋喎！」我知你會咁講，我哋亦未滿足於這些尋常小食，帶路司機話：「蝙蝠你食過未？」嘩！自小睇教育電視知道蝙蝠似足有翼老鼠：「食唔食得o架？」「何止食得，仲養顏㖭呀！」好，即去。汽車離開鬧市直奔山上，一片山林之中，路旁突然出現一家店，店前停滿車輛，心諗：「莫非是人氣食店？」店內比之前的更暗，但氣氛非常熱鬧，坐滿當地人，大排筵席：「這裏的小食都是小份小份的，可以一次過試盡不同食物吖嘛！」侍應正解釋桌上十足韓國料理滿枱大盆小缽的盛景，「沙嗲串燒我們在香港食過了，仲有咩必食推介？」「必食一定係蝙蝠！唔知你敢唔敢食啫……」我輩後生最唔襟激：「就要一份！」沙嗲串燒豬牛雞、木瓜沙律、咖喱雞統統嚟齊，壓軸一碗黃撞黑的：「這就是咖喱蝙蝠，慢用！」外表同樣大倒胃口，黑色蝙蝠肌膚點都唔覺得可以擺入口，今次係咪玩大咗？事到如今只能頂硬上：「影相先啦，吃吧！」Paris當堂O嘴：「吓？乜嚟真o架？」「作為記者，當然堅食，你都係專業model呀呵！」我先吃，咖喱有辣勁，蝙蝠肉質結實似雞肉，表皮膠質頗重，特別是翼位，充滿骨膠原，大概是司機所說的養顏吧！食落蝙蝠並無奇怪味道，若然不說，定必以為是咖喱烏雞，侍應補充：「這種是果蝠，食生果大的，非常健康。」Paris也放開懷抱，吃罷一件再一件：「果然同食咖喱雞無乜分別，翼位唔好同我爭，我要美肌呀！」
b.RumahMakanHeng-Mien：Jl.RayaTomohon,Manado
辣味木瓜冰
總算試過美娜多最地道「美」食，回市區途中不時見到路邊果檔，有大堆小堆似龍眼的果實，是當地特產櫨沽（Duku），香港間中也有賣，但自然不及當地即買即食新鮮。掰開充滿黐黐汁液的果皮，底下是半透明果肉，質地軟腍富彈性，味道清甜，隨手買了一磅上車食。回到市區，原來仲有新奇小食。小店坐滿下班的人，全場清一色木瓜冰，以為純粹消暑解渴的小吃，店員急忙指着桌上一碟辣椒粉，心想：「唔係要加落去呀嘛？」一心求地道，自然樣樣要試！木瓜經醋醃，淋上魚露有種既酸且鹹的古怪味道，但大熱天之下卻異常醒胃，加上辣味頓時五味紛陳，似甚麼？人生呀！甚富哲味！唔多講了，我需要沉思……
c.RumanEsMiangas：Jl.JenderalSudirman1,Manado
PanikiinManado
溫馨提示：行程中有餐廳售賣一種名為椰子蟹的海鮮，但此為買少見少的瀕危蟹種，奉勸各位少吃為妙。
TravelMemo
持BNO人士可於到達後辦理落地簽證，護照須有效6個月，費用為25美元；持特區護照人士免簽證可停留30日。印尼駐港領事館電話：28904421
康泰旅行社獨家開辦北蘇拉威西、美娜多5天團，行程包括布那肯海洋生態保護區、五色湖、利廣海底斷崖及白水河激流等，團費$3,799起，查詢：21088888
1港元約兌1,194印尼盾（文中價錢已換算為港元）
127/220V，雙孔圓腳插座
印尼
美娜多
下周雷暴有雨，20-32℃
