農曆年前海關高調到年宵市場掃走諷刺民建聯嘅「禮義廉」T恤，社民連質疑海關行動，要求立即「釋放」件衫，海關噚日回覆社民連，正式拒絕要求，要繼續扣查件衫。
社民連秘書長季詩傑向八方表示，噚日接獲海關回信，指再諮詢法律意見後，現在引用《版權條例》第131條扣查撿走嘅T恤，因此唔會退回啲衫，並要求社民連提供物品持有人姓名及聯絡地址。季詩傑指海關要再次諮詢法律意見，意味掃場當日「唔知自己做緊乜嘢」，同民建聯一樣，否則唔使補鑊引用另一條例繼續扣查T恤。
社民連會繼續研究如何就海關行動提出司法覆核，至於是否提供物主資料，季詩傑話要詳細研究吓才可以作決定。