家啲電訊商搶客搶到暈，CSL噚日開設全港首創24小時網上電訊專門店one2free，喺網上大賣電話連服務計劃。小妹上網click入去睇吓（shop.one2free.com），網頁列明唔同種類嘅手機、月費計劃、流動寬頻服務同優惠等，仲有一個「幫我選擇」icon，會根據用家嘅喜好，建議適合嘅手機同服務計劃。選完機計埋價錢、回贈等，都幾清楚。
小妹搵CSL商業總裁Barry了解詳情，佢話家競爭激烈，開網上店可以畀啲客多個選擇，隨時隨地上網買手機，「訂後需時兩日免費送機上門，離島都送。」咁啲電車男咪足不出戶都買到手機？Barry笑笑口話，都係畀個方便佢哋啫，其實網上購物嘅客群都好大。
須推介facebook程式
開張大吉梗係有優惠，網頁設咗「我的one2free專門店」facebook應用程式（shop.one2free.com/facebook），畀啲客分享用機心得。本身係facebook嘅用家噚日起首五個禮拜內，向朋友推介呢個專門店應用程式，頭1,000個最多朋友接受邀請嘅玩家，可獲贈手機一部。咁着數，小妹即刻搵朋友先。
互聯網專業協會創會主席林永君話，網上購物已經好流行，電訊商家先推網上專門店都算遲，佢哋之前集中街頭搶客，家CSL擴展到網上平台，相信其他電訊商會跟風。
電郵：mailto:[email protected]