《成報》大老闆楊家誠做咗英超球隊伯明翰揸弗人之後，球場上非常得意，但係同《成報》有關嘅新聞就冇單好嘢。最新消息係成報網站今個月1號已經靜悄悄停止運作，click入去個網頁仲話更新中，知情人士踢爆個網站其實已摺埋，負責網站嘅四名員工停薪留職，前途未卜。
據講楊老闆請咗位新CEO睇檔，新官上場，佢字典只有一個慳字，樣樣都話要收緊開支，員工影印要記低影幾多張紙；放工前部門主管要確保關掉電源；廁紙質地越嚟越差劣，早前減咗嘅人工更加唔知幾時加得番，員工都十分沮喪。呢邊喝停網站運作，嗰頭又拖住啲廣告sales佣金唔出，有員工認為係有人玩嘢，想踢走啲唔順眼嘅員工。