病危北京嘅徐展堂出身寒微，白手興家成為叱咤政商界人物，由於其生意涉及中國軍方，更添加神秘感。外界對佢印象較深嘅，係佢多次大手筆捐贈中外博物館，被譽為中國十大文物收藏家之一，藏品數量難以估計，媲美國家級博物館。
按下暗掣書架移開
早年徐展堂喺山頂有間大屋，有曾獲邀到其大宅嘅人同八方講，徐展堂必會請賓客參觀其私人珍藏，睇過其藏品者稱，只能以嘆為觀止形容。
據講徐展堂特別喺書房內設置「藏寶庫」，表面上係一列書架，但只要按下暗掣，整排書架會移開，「好似睇占士邦007電影咁，好神秘。」
書架移開後，當然內有乾坤，「粗略估計個藏寶庫應該有成300呎，成間房隨處放滿古董、文物，仲有兩張枱，一張係普通寫字枱，兩張枱面都放滿一卷卷字畫。」呢位曾到徐府開眼界嘅人士稱，佢真係唔識貨，唔知庫中文物係乜嘢，有幾矜貴，「總之陶瓷、石器、雕刻、青銅器乜都有，博物館都未必有咁多。」
另一位曾參觀藏寶庫嘅人則話，印象中藏品以瓷器佔多數，「佢話放喺度嘅都唔係最值錢嗰啲，最有價值嘅都畀咗國家。」徐展堂與北京關係良好，呢位一度同佢「一星期食幾次飯」嘅人士稱，據講徐展堂家族與中國軍方高層有關係，故獲北京信任，因此在前過渡期，親中圈子甚至一度視佢係北京悉心栽培嘅特首人選之一，「就算唔係想佢做特首，都想捧佢喺97年後進入政府高層。」
真正能「直達天庭」
與徐展堂認識多年嘅一位政協指，徐展堂當年係真正可以「直達天庭」嘅人，「佢可以同極高、極高層次嘅中央領導人提意見，好多北京對港長遠政策，尤其係經濟方面，都係佢提出。」可惜喺徐展堂事業如日方中之際，爆出婚姻有問題，雖然後來浪子回頭，但政途已行人止步，後來因生意失利而越趨低調，近年鮮見喺本地政圈活動，對一般香港人而言，佢只不過是眾多紅頂商人之一罷了。
mailto:[email protected]