應采兒上月在美國和陳小春註冊結婚，昨日春嫂婚後首次開工，她透露做陳家管家婆，但不會要老公將收入全數上繳。應采兒又懶理杜德偉爆小春曾激咀梅艷芳，自認咀過不少人的她，只希望老公婚後惜嘴如金。
今年大年初一嫁給陳小春的應采兒，昨日首次以陳太身份開工，她在尖沙嘴與黃宗澤及陳嘉容一齊出席活動。采兒在台上被司儀稱呼為春嫂，顯得非常受落，她說：「叫我陳太都未識回應，最好唔好叫我陳師奶啦。」
禁老公拍接吻戲
杜德偉最近出新書，大爆陳小春曾和梅艷芳激咀，采兒對此說：「係咩？冇睇喎！唔係咁好啦，人都唔喺度嘞。」問她可會扭小春耳仔？她說：「唔會，我當年都咀過唔少，以後就唔得。」問采兒是否不准小春拍激咀戲？她說：「電視就唔准，電影就睇劇本，最好都唔好啦。」日前樂基兒爆黎明沒有給家用，采兒表示未和老公商量家用問題，但不會沒收小春所有收入，她說：「男人始終經濟上要有啲空間，我媽咪管束爸爸好嚴，唔係個個男人都受得到。」采兒表示現時做管家婆，事無大小都要處理，但她下周又要起程到上海拍劇，一人分飾兩角，要剪短髮扮孖妹。
調理身體趕生仔
至於生仔大計如何？采兒說：「搞掂啲酒席先，家40、50圍都請唔晒，今年得35日好日，除去啲相冲日子，又要揀星期六、日，家先定到一日。」她謂顧及老公年紀大，所以會趕生仔，現時自己睇中醫調理身體，因為想生多一兩個。同場的黃宗澤被問到和陳茵媺的緋聞，他表示緋聞全因拍劇，毋須和胡杏兒備案。
採訪、攝影：顏英儀