補選公投22號開始提名，繼白姐姐揚言要硬撼毓民後，再傳出有「重量級」人物要挑戰長毛，就係歌藝、廚藝都了得嘅肥媽。
以湊仔形容參政
其實話肥媽係「重量級」人物可能唔係太準確，事關佢近年纖體成功，重量應該要打個折扣，佢承認積極考慮參選，例牌嗰句，「問過屋企人先決定。」精於炒餸嘅肥媽政見都離不開柴米油鹽，話政制發展不能即煮即食，佢反對「熱飯熱食」。
食家講究鑊氣，有餸趁熱食八方就聽得多，熱飯如果唔係熱食，唔通攤凍食冷飯？唔通肥媽講緊食壽司？佢仲以湊仔形容參政，話細路仔唔係眨眼就長大成人，要花時間湊，總之一句，社民連啲激進口味唔啱佢。
公民黨中人稱，暫時未能評估肥媽參選影響，估計如果令補選更騎呢，可能令民主派選民反感更有利公投，長毛則話奉陪到底。肥媽同蕭若元有交情，而毓民同蕭生又係老友，所以有人陰謀論，懷疑肥媽可能就係所謂「補選B隊」嘅先頭部隊喎。