周五26/02
呢期德甲依絲執
禮拜五德甲波唔太難估，近排來來去去都係兩、三球，今次我貼中埋波膽，可惜串英甲查仔3:1未竟全功，不過臨尾開到個2.15倍客W畀你，仲想點？
閒贏指數：☆☆☆
周六27/02
小兵成熟最大安慰
我會記住這天！貼中大冷曼城破車7.5倍W，之後同戰友食消夜撐阿仙奴，但睇到藍斯被踢斷腳，睇到媽媽聲！驚歷史重演，阿仙奴班小虎被打殘；但臨尾入兩粒士氣大振，主力們危機處理成熟咗，唔通今季……
閒贏指數：☆☆☆☆
周日28/02
中荷甲唔夠維拉輸
荷蘭波唔難買，我吼到列強喺歐霸大舞台全出局，機會來矣！先中阿積士再中燕豪芬，可惜到維拉撼紅魔，個球證唔趕維迪出場只判維拉得12碼，造就紅魔反勝；贏不到錢，擂台不到榜首，深夜波冇興趣買咯。
閒贏指數：☆☆☆
周一01/03
大笨象業績冇眼睇
踏入國際賽期，可以不買；睇番股壇矚目嘅大笨象（5號仔）業績，差過預期好多，春江鴨炒業績者中伏了；但最離譜係10間大行嘅預測全部錯晒，有啲仲離行離列，所謂專家，有時不過爾爾。
閒贏指數：☆
周二02/03
你有冇唔瞓睇巴西
全日焦點，巴西打愛爾蘭，但去到深夜4點開波，邊有人咁爛癮唔瞓覺睇波呀？世界盃，大把機會啦；只想讚莊家好嘢，㩒到巴西個W得1.35倍，呢場波應冇乜人睇，應該冇乜普羅球迷豐收。
閒贏指數：☆☆☆
周三03/03
周三波馬冇興趣
放假，只想放鬆一下，揼吓骨睇場戲，好舒服；無謂友賽唔啱我，見谷草夜馬陣容，更加冇興趣，胡亂買啲例飛志在參與，本想睇番一兩場當為世界盃前溫習，但長夜漫漫，睡魔卻早call。
閒贏指數：☆☆☆
周四04/03
阿甲主打啱晒阿伯
竟然係阿甲主打，晨早開場，啱晒晨運阿伯，小注怡情；博到早兩日咁，開個沙士菲和小保加4:4，買10蚊都幾爽o架，不過唔知要追到幾時啫。
閒贏指數：☆