唔少中大師生都話，校長劉遵義神龍見首不見尾，八方上月收到封信篤佢不務正業，連高錕返港捐諾獎畀中大，劉遵義都失場，質疑佢另有「正職」，中大校長只係兼職，無理由收足年薪近450萬元。
累積捐700幾萬給中大
面對師生質疑，中大噚日透露劉遵義原來好慷慨，上任以來，將兼任校外公司董事所獲嘅袍金同演講報酬全數捐畀中大，05年起至今累積有700幾萬元，至於是否包括行會每月薪津61,770元，中大冇說明。行會資料顯示，劉遵義擔任10間機構顧問或公司董事，難怪收入豐厚。
中大又指劉遵義公事私辦，利用累積年假去開行會，形容校長「悉心治校之餘，不忘服務人群。」更披露劉遵義去年6月已減薪5.38%，先過特首、高官減人工。
中大學生會會長黎恩灝話，擔心劉遵義太多公職影響在校工作，校友關注組成員繆熾宏話既然劉遵義好快離任，以前啲事無謂再抽秤。
教院校長張炳良都係行會成員，佢話行會津貼扣稅後，餘款用嚟請助理。港大校長徐立之透過發言人話，校長冇乜額外收入，多數係義務性質。