好諷刺，雖然托迪太座芭拉絲（IlaryBlasi）自稱足球白癡，仲成日喺球場認錯自己老公；但原來「王子」會唔會代表意大利踢今夏世盃呢啲國家大事，決定權就喺「王妃」手上。
既然叫得托迪做羅馬「王子」，咁芭拉絲自然係羅馬「王妃」；但佢冇因為老公熱愛足球而愛屋及烏：「廿幾個球員喺球場上爭波，都唔知為乜；所以我好少睇波，球賽嘅嘢我唔識，一律免問。」芭拉絲繼續講：「就算我真係入場睇波，都成日將另一啲人認錯係法蘭斯哥（托迪名字），好大頭蝦。」
芭拉絲唔識波唔緊要，最緊要馭夫術了得。3歲入行做廣告童星，之後活躍於意大利電視界同model界；到05年打敗一眾托迪身邊異性成為托迪嫂，升格做「王妃」，芭拉絲至開始低調，喺娛樂圈嘅工作不斷減產，安份相夫教子，唔怪得托迪錫晒佢。
「我係佢就一定會踢」
唔係話托迪好似施丹咁怕老婆，但原來生活上大小事，好多時都由芭拉絲話晒事；可能連意大利記者都知佢夠「猛」，關於托迪會唔會重返國家隊、踢埋南非世界盃，早排都問過芭拉絲。
我哋即管聽吓呢個「80後」嘅「王妃」點答，「如果我係佢，我就一定會踢。至於我就會帶埋子女陪佢，話晒我哋成家人未去過南非，咪順道去旅行囉！」喺球場，托迪係策劃者；喺生活，芭拉絲至係策劃者。
想知「王子」最終會唔會征戰南非，睇嚟都要問過阿嫂先。
芭拉絲小檔案
出生日期：28/04/1981（28歲）
出生地：羅馬
身高：1米72
職業：電視節目主持
婚姻狀況：育一子一女