小妹最鍾意食壽司，唔會肥膩食肥人，但食嚟食去主要係三文魚壽司、鰻魚壽司咁，我諗好多香港女士都同小妹一樣。小妹噚日趁元氣壽司15周年紀念舉行試食會，走咗去學吓嘢。
佢哋將全新大滿足系列嘅15款壽司大晒冷畀人試食，挑戰各人嘅味蕾。人稱康哥嘅元氣壽司營運總監葉育康話，啱啱新增咗兩款係香港好少有嘅壽司，分別係日本白象拔蚌壽司同海鰻天婦羅壽司，「我哋花咗成年先喺日本搵到貨源穩定嘅白象拔蚌，佢比巿面常見嘅加拿大象拔蚌細，但肉質豐厚，入口爽脆，鮮味係蚌類之首。」
專家教路點樣食
講到咁，小妹當然要試食，康哥提醒話，唔好點咁多醬油同芥辣，正確做法係將魚生上輕輕蘸啲醬油就得，「唔少食客將成舊壽司蘸晒豉油，好似游水咁，咁樣會遮晒魚生嘅味。」
康哥又話，一件壽司背後師傅要花好多功夫，好似赤海蝦壽司。啲蝦由日本原隻運嚟，師傅要除去蝦頭蝦殼，又要將蝦浸入冰鹽水令蝦肉更鬆身，再將蝦肉開邊。
康哥講到咁滿足，小妹都要滿足一下，先食象拔蚌，唔敢點咁多醬油，食落口又幾爽幾鮮；再試海鰻天婦羅壽司又係另一種感覺，入口又暖又香脆，再咬大力一啲，內裏鬆軟。
康哥話，15周年店內裝潢要大革新，以稻米為主題，店內顏色以淺木色，放上日本木桶裝修，「等啲客食得舒服啲。」中大巿場學系教授冼日明話，家連鎖食肆紛紛「升呢」，環境要好，食品又要超值。收到，咁唔知幾時學似泰國咁，提供茶餐廳嘅價錢、酒店式嘅享受呢？
電郵：mailto:[email protected]