二月二十六日星期五晚上，有「馨香宴」之舉行，「馨香宴」乃一年一度之專欄作家與報刊老編之春茗，年年都有百零人出席，情況十分熱鬧。當日係立法會議員推選一位議員代替已辭職嘅黃毓民議員做中文大學校董。校董之位素來冇議員爭取，今年呢個替補校董就爆出陳茂波議員與余若薇議員兩位競選。
專欄界編輯界有好多中文大學校友，呢晚「馨香宴」嘅出席人士之中，中大人多到數唔晒，呢個話我係崇基嘅，嗰個話我係新亞嘅，又有老總話我係中大新聞碩士，總之個個關心邊一位獲選為中大校董，一位政治版編輯報告：「波仔贏咗嘞。」即引來一片喝采之聲，原來幾乎個個在場中大校友都支持陳茂波（新亞畢業生）做中大校董，有一兩位係公民黨之友唔出聲，無謂夾硬問佢哋嘅意見啦。左丁山老早在本欄透露，主流/老牌校友會如新亞校友會、聯合校友會、中大校友會聯會兼逸夫書院校友會主席梁裕龍（醫生）、中大校友評議會主席劉世鏞（會計師）與副主席李劍雄（律師）等人支持陳茂波，只係崇基校友會會長侯運輝（律師）新年遠遊未返，未有表態而已。
今次立法會議員十分尊重「民意」，尊重中大校友主流意見，選出陳茂波做中大校董，值得一讚。據一位資深校友講，好多年前中大校友會聯會曾有辯論，講如何爭取民主，結果大多數意見認為校友會不是政治團體，不宜就任何政治議題表態，不宜涉及政治爭拗，如校友有意從政，值得鼓勵，但那是私人選擇，與校友會無關；當時有人舉出例子，吳明欽、張文光與楊耀忠、馬力分別係新亞及聯合畢業生，同屬中大，但四人嘅政見截然不同，往往針鋒相對，如果在校友會講政治，校友會豈非分裂為兩派？要講政治嘅話就各自加入不同政黨啦，唔好搵校友會嚟搞。牛津劍橋校友分別加入保守黨、工黨，哈佛耶魯校友分別加入民主黨、共和黨，慶應校友分別加入自民黨、民主黨，佢哋邊度會以牛津、哈佛、慶應校友會作為議政平台o架！全世界嘅校友會都係以校友聯誼（socialnetworking）及為母校籌款，幫助母校發展為目標嘅，母校發生嚴重錯失，校友會當然會有意見，但邊會樣樣針對校長，嘲罵校長咁無聊o架。