香港興業（480）噚日春茗，華華有幸成為座上客，同老闆查懋成一齊食鏞記燒鵝，第一次同查生（加埋佢幾位得力老臣子）交手，華華大開眼界，事關好少老闆同高層講嘢咁直！問查生點睇香港嘅地產行頭，佢話政府似乎有個戰略，要啲中小型地產商摺埋，事關地已經唔夠，但勾親出嚟幅幅都鬼咁大，佢哋根本啃唔落，即係變相叫最大個幾家人玩晒唧。
到咗飢不擇食階段
咁興業呢？家佢哋同其他行家一樣咁餓，仲到咗飢不擇食嘅階段，佢哋唔會太揀擇，但亦唔會亂食嘢，致勝策略惟有幫自己啲盤諗多啲嘢增值增值……一句講晒，官如果要同商勾結，其實都睇個商，係咪夠大！
見到查生，問佢哥哥懋聲同旺旺蔡單嘢（家仲變成官司！），查生話自己從來無參與，真係乜都唔知，啲料都係睇報紙得番嚟……雖然佢唔係俾人狀告之列，但兄弟嘅嘢使唔使搞到睇報紙至知呀？睇嚟查家兄弟要多啲搞家庭聚會嘞！
新地首創iPhone睇樓
查生呢邊廂先怨唔夠地，怕無樓賣，嗰邊廂嘅大發展商新地（016），就繼續趁市旺推盤。新地sell大角嘴形品．星寓（LIMEStardom）都sell得有新意過人，樓盤target一班用iPhone嘅潮人，所以特登用住宅項目整咗個iPhoneApp，只要用部iPhone就可以免費下載呢個樓盤嘅資訊（圖），首創電子售樓書，開創賣樓新推廣手法先河。用iPhone睇樓，唔使去睇示範單位同人逼之餘，仲夠潮又環保，真係一舉幾得喎！
高盛四日極速轉軚
發展商鍾意出（售樓）書，大行都唔輸蝕，得閒就會出吓報告，散戶就最鍾意跟住買。好似高盛今個禮拜一先出報告，話中移動（941）入股浦發行冇着數，仲話睇唔到有需要為咗一間細銀行而放棄成個森林。點知，前日「王總」王建宙為件事解畫後，高盛轉頭喺噚日又再出報告，仲反口話長遠有利喎。原因？高盛話入股可以俾中移動更深入咁研究手機銀行，簡直係新嘅業務亮點㖭！四日之間由唔妥變為支持，高盛轉軚轉得咁快，散戶點跟呀！
唔妥變支持 評級照舊
高盛對中移動嘅睇法，雖然好似女人咁善變，之不過，佢對中移動，實際係一條心無變過，事關佢俾中移動嘅評級同目標價，仍然維持番「買入」同86蚊雞。
李華華