曾幾何時雄霸本港娛樂市場的卡拉OK，一招獨家試唱吸納過無數K迷進貢，也為唱片公司帶來可觀收入。不過隨着近日市場傳出Neway收購加州紅，即Neway會壟斷卡拉OK市場後，有業內人士認為將影響唱片公司徵收K歌版稅、減少宣傳渠道及欠競爭，現與Neway鬧侵權官司的華納更首當其衝，旗下歌手薛凱琪及方大同等隨時變炮灰，分分鐘無緣亮相卡拉OK螢幕。
歲月汰弱留強，本地大型卡拉OK連鎖店經歷多個年代衝擊後，現只餘下Neway和加州紅屹立不倒。近日市場有傳Neway將收購加州紅，K場勢必由Neway稱霸，同時也對唱片業及歌手造成影響。唱片公司收卡拉OK版稅可能被壓價，消費者欠選擇，唱K收費或因而偏高，甚至隨時影響四大唱片公司歌手的歌曲播放率。
華納Neway官司未了
Neway和加州紅多年前本是合作夥伴，00年兩公司共同成立子公司，主力與唱片公司洽談卡拉OK獨家試唱版權，實行有錢齊齊搵。08年關係突變，加州紅指Neway單方面與唱片公司洽談，遂向法庭申請禁制令，翌年雙方達成庭外和解，但經此一役兩者友好不再，如今突演變成Neway收購加州紅，確令人始料不及。
以往加州紅擁有四大唱片公司包括環球、華納、Sony及EMI的獨家試唱版權，東亞及金牌等就與Neway合作，英皇則與兩K場俱有合作。不過在今次Neway的K場收購戰中，與加州紅一直合作獨家試唱的「四大」似乎較吃虧，尤其華納更變成夾心人。本來華納歌手方大同和薛凱琪等的新歌在加州紅有得唱，但華納上月入稟高等法院控告Neway侵權，現官司未了，Neway收購加州紅或影響華納歌手在卡拉OK播放的機會，華納昨不就此事回應。
對於收購一事，環球揸弗人黃劍濤昨說：「暫時唔comment，我覺得到最尾都係打開門口做生意，唔會影響收入，亦唔會冇得傾。」一K場獨大是否不健康？「冇得講好唔好，係消費者決定。」身為環球的謝安琪昨於上環出席活動時則說：「我都唔知有冇影響自己，我成日好似打幾份工咁，我都唔知自己嘅歌喺邊度可以唱。」
東亞：市場欠競爭
非「四大」的東亞娛樂與Neway合作無間，高層陳志光對Neway獨大昨則說：「當然市場冇競爭嘅環境梗係唔好啦，不過市場自己會調節嘅，市場好就會有投資者，我唔係太擔心。」擁有Freeze和羽翹等歌手的娛樂公司老闆蕭定一，被問到會否認為Neway壟斷K場時，蕭定一說：「到時卡拉OK未必肯畀錢買歌，都冇需要買啦，冇競爭之下就算畀錢都唔會多。」
前BigEcho老闆娘劉麗萍自從離開卡拉OK業後，近日她重出江湖開設歌唱學校培訓新人。提到Neway在K場隻手遮天，她昨接受電話訪問時說：「冇乜所謂，連鎖式嚟講係Neway出名啲，但有好多細型卡拉OK都有自己客路。」有指一K獨大或影響唱片公司收益，劉麗萍也認同，「有呢個可能性，唔會畀好大嚿錢唱片公司，長遠計對唱片公司冇乜好處，會少咗渠道宣傳。其實係好短視。香港嘅音樂事業應該聯手合作。」
Neway準新抱陳法拉對此說：「恭喜佢哋，大薛生（Neway大老闆薛濟傑）係個好叻嘅生意人，恭喜佢嘅成就。我冇問我朋友（男友薛世恒），生意嘅嘢唔問。」
採訪：丁寧
Neway壟斷後果
‧華納歌曲或未能在卡拉OK選唱
‧唱片公司向卡拉OK徵收的版權費可能降低
‧消費者或需付較昂貴唱K價錢
話你知：卡拉OK變娛樂王國
Neway創辦人為薛濟傑，首間卡拉OK店於93年開設，當時名為新時代卡拉OK。現時全港有23間分店，業務更拓展至澳門、內地及馬來西亞。近年Neway由薛家兩位公子薛世恒及薛嘉麟打骰，故兩人的另一半陳法拉及諸葛梓岐經常被戲稱為Neway新抱。Neway於00年殺入娛樂界成立星娛樂，歌手有張智霖（圖）、鄭融、鍾嘉欣、胡杏兒及HotCha。
港卡拉OK發展史
71年：日本音樂家井上大佑〈圖〉發明最早的音樂伴唱帶，是卡拉OK的前身。
80年代：音影存儲形式發展成熟，卡拉OK在日本開始流行，更成為大眾的娛樂。
88年：卡拉OK正式傳入香港，不過當時仍未普及，消費者只能光顧「大廳」，且價格昂貴。
隨着卡拉OK逐漸蓬勃，衍生蚊型卡拉OK場所，顧客需到counter自選心水LD，拿入房間自行打碟。其後演變成有歌書供顧客挑選，輸入歌曲代號後，有專人為顧客打碟。
有伴唱女郎的卡拉OK開始取代夜總會，成為港人傾生意熱點。
90年：港人將卡拉OK文化推廣至內地，首間卡拉OK在海南省出現。
91年：葉玉卿兄長葉志銘成立飛圖唱片〈圖〉，進一步開拓卡拉OK市場，梁雁翎歌曲狂播，背景多以風景畫面為主。
92年：寶麗金《碟聖》、華納《天碟》相繼推出，大多不採用原聲音樂，製作比較粗糙。古天樂當時曾擔任這類型的MV男主角。
合唱歌興起，許秋怡、張智霖的《現代愛情故事》，蔣志光、韋綺珊的《相逢何必曾相識》是必唱曲目。
加州紅在世紀酒店設立首間店舖，也是全港首間擁有中文電腦選曲系統並提供餐飲服務的卡拉OK。
93年：Neway（前稱新時代卡拉OK）開設首間店舖。
隨着科技發展迅速，從前千多元一隻的LD，已大幅劈價，集星級歌手MV的雜錦碟《真開心》才二百多元一隻。
94年：為顧及大眾歌藝造詣，流行曲逐步降低歌曲難度，衍生大量俗稱為「K歌」的廣東歌，「K歌文化」迅速普及。
95年：15歲的容祖兒在BigEcho舉辦的卡拉OK大賽中奪得金獎，獲正東唱片歌星合約。
95年：LD逐漸遭淘汰，加州紅首次與唱片公司合作，由加州紅出資製作，並以優先播放方式，造成哄動。其他卡拉OK集團爭相效法，形成汰弱留強局面。
Neway、前衛、BigEcho、NICAM、TopOne、嘉禾、創藝與活力energy等九間卡拉OK組成「大聯盟」，合力抗衡加州紅「獨家試唱」。
97年：尖沙嘴盈豐商業大廈內的TopOne卡拉OK突然起火，造成17死13傷，是至今傷亡最多的卡拉OK事故。
00年：台灣錢櫃登陸香港，改名為V-Mix，是香港當時最大型的卡拉OK，有獨立廁所。
Neway及加州紅聯成一線，合組同成發展有限公司，雙方各佔一半股權，專責與唱片公司洽談歌曲的卡拉OK版權。
03年：沙士肆虐，BigEcho被迫結業〈圖〉，形成Neway及加州紅雙雄競爭局面。
03年：為針對年輕人市場，加州紅將業務分為Greenbox、Redbox及RedboxPlus級別，又引入Greenbox遊樂場，將PS2、buffet、明星牆紙等引入，娛樂更多元化。
09年：加州紅入稟法院，就歌曲「獨家試唱」權控告Neway。環球唱片的歌曲版權歸加州紅，因而觸怒Neway。
加州紅向顧客徵收版權費，光顧者須按人頭支付最多8元。
09年：Neway和加州紅「獨家試唱」權案開審，雙方經洽談後庭外和解。
Neway收購加州紅。
資料來源：《蘋果》資料室
