有消息話賭王何鴻燊呢幾日會出院，一向同傳媒好合作嘅三姨太陳婉珍，噚日大約1點左右去醫院探賭王，佢好明顯刻意走另一個門口避開守候嘅記者，即使記者叫佢，三姨太都唔應又垂低頭急急腳走入醫院，記者再問賭王係咪聽日出院？三姨太一反常態話：「唔知。」
超盈男友Greg呢排喺英國，所以佢日前喺香港同班朋友夜蒲，點知就俾傳媒話佢同老友Moiselle太子爺Harris及老外朋友表現親密。前晚超盈一身短褲黑超到醫院，見到佢對腳花斑斑，唔知佢俾蚊叮定係仆親呢？
怕男友呷醋
問超盈係咪陪賭王？佢陰聲細氣話：「係呀，今晚到我陪爹哋。」經過一晚，超盈噚日離開時滿面愁容，佢話：「啲報道失實囉，男朋友20號會返，之前男友都見過爹哋。」睇嚟超盈好擔心男友會呷醋喎，至於賭王幾時出院，超盈都冇厘神氣話：「唔知，問番家姐。」
另外，日前話喺法國滑雪搞到成身痛嘅關之琳喺朝早8點幾到養和，問到係咪唔舒服？之之冇答一支箭咁走入醫院內。