昨日同某外資投行基金經理傾開，佢問星俠有冇留意近期有乜風吹草動，港股跌幅都比中美兩地股市大，似乎有啲隱而未發的消息。港股昨日就憂慮內地加息，恒指大跌301點，收報20575。
踏入3月，股海氣氛其實已見好轉，但飄忽市況折騰散戶，似乎今年都會好難玩。內地確有加息條件，而過往內地加息，好多時都係等股市收市後，或在假期前才公佈，如果今次大陸真係加息，唔知手法會否相同，大家不妨留意。
港股波動市況唔易應付，散戶入市宜選優質股，最近幾家大行不約而同睇好中信資源（1205），昨收2.10元，跌1.4%。其中大華繼顯發表報告，提升該股至「買入」，12個月目標價由1.05元大幅上調至2.70元。
大華繼顯睇好原因係中信資源之海南月東區油田，預期今年次季投產，初期日產3000桶，到2013至2014年全面投產時，可增至日產3.6萬桶，所以每次調整都可趁低買入。
方星俠