兩會開幕，金句必多！疑似亞洲電視新主人王征，噚日出席全國政協會議時話，希望自己可以成功入主亞視ATV，如果okay嘅話，佢諗住「用20年時間，將亞視打造成亞洲嘅CNN（即係美國有線電視網絡）！」嘩嘩嘩，唔理征哥憑咩理由拋出呢句豪情壯語，但個勢就唔講得笑。
人家CNN響1980年創立，搞到家先有咁嘅規模。亞視嘛？年紀仲老過CNN好多，係就係香江第一個電視台，但四十幾年嚟，經過多個富豪搶救，家仍然喺ICU留醫咁款，連TVB都未鍊得贏，就諗住做CNN？征哥會唔會係一時興奮講大咗？不過，征哥家四張幾，做多20年，即係六張幾，頭都白晒！點都好，華華都戥亞視上下開心，至少仲有廿年玩，唔驚無得撈！
大陸收緊banker銀根
金融海嘯元凶花旗國，諗住改革銀行薪酬制度，打壓華爾街大鱷，我哋偉大嘅祖國為咗同世界大國睇齊，決定照跟！內地官方媒體話，今個月或者有限制銀行高層薪酬嘅新規例出台，措施包括設立獎金上限，仲要同長期業績掛鈎、分批發放。
另外，高管級人馬獎金唔可以超過工資3倍，其中最少有40%由銀行保管3年。最高話事人呢？50%獎金會被扣起，假如又有大單嘢發生，銀行仲有權追番俾咗出去嘅獎金，甚至可以終止發獎金……真係槍桿子下不會出亂子，奧巴馬宜學習學習！
李華華
mailto:[email protected]