賭王何鴻燊仔女戀事多，三房嘅18歲女兒超蓮同男友Jeremy已經煙韌到搣唔開。日前佢哋先十指緊扣出席超雲生日會，大晒恩愛，噚日超蓮探完賭王病後，又黐實男友去海洋公園，仲以情侶裝打扮示人，Jeremy嘅tee印有單球雪糕公仔話「我高因為食雪糕」，超蓮同款tee嘅雙球雪糕回應「我高因為啜住你」，擺明示愛兼公告天下我食住你。
買定飛睇戲
噚日下晝5點左右，超蓮現身銅鑼灣時代廣場附近會合男友，拍拖買定飛睇型男尊尼狄普（JohnnyDepp）主演嘅《愛麗絲夢遊仙境》（AliceinWonderland），問佢哋點解唔睇3D版？超蓮至突然醒起：「係喎！可能會睇番。」跟住兩人就上女方嘅7人車去海洋公園，一入場就搵漫畫攤檔，仲放低一張相交畀畫師，冇耐就畫起咗一幅Q版漫畫，畫中着住禮服嘅賭王同拎住束花、着住婚紗嘅三姨太一齊騎馬，畫側寫有賭王英文名StanleyHo，以及祝父親早日康復嘅英文。
雖然幅畫價值約120大元，但物輕情意重，超蓮同Jeremy手拖手由正門離開時，佢仲不停望住幅畫咪咪笑，睇嚟呢位何家淑女都好錫爹哋。繼而兩人搭的士去大樹灣，可惜公園6點關門，機動遊戲停晒，只剩番啲測運程機同測體重機，冇得玩機動遊戲都覺得好掃興。