「變相公投」要使1.59億元，成為建制派打擊公投運動符咒，開口埋口話浪費公帑，議員咁鬼勞嘈，皆因當局日前去信所有立法會同區議會議員，要求係4月15日、即5.16補選日前一個月要清拆所有街板，騰出位置供補選候選人掛宣傳板。
事關拆街板要搵專人搞，閒閒哋要百幾蚊一塊，由食環署代勞，庫房開單仲貴，難怪好多議員牙痛咁聲，自由黨主席劉健儀噚日講起呢件事好激動，質疑有乜理由要如此勞師動眾？劉主席日前親自致電林D9吐苦水，據聞林D9聲稱唔知情，僅承諾會了解了解。鼠王芬噚日則向林D9面陳不滿，可惜林D9回應模稜兩可，鼠王芬指佢講完等於冇講，聲言大不了公民抗命，誓不拆街板。
議員可向政府claim番掛街板支出，拆街板理論上可以入政府數，都係納稅人埋單，建制派議員唔係真係咁闊佬自己畀啩。當年搞個維港巨星匯爛show都花1億元，補選用億半，點計都抵好多啦！