久未露面的夏文汐昨日出席護膚活動擔任特別嘉賓，宣佈正式復出。復出頭炮將會拍電影，她希望復出後可以攞最佳女主角來肯定自己，育有３女的夏文汐身材fit爆，更自爆腰圍只得24吋。
護膚品牌LaMer昨日於灣仔舉行產品發佈會，夏文汐擔任特別嘉賓，穿上Escada近兩萬元的黑白斑馬紋背心裙現身的她盡現美好身段，名人嘉賓有汪詩詩、九巴新抱雷林靜儀、樂易玲等，席間樂易玲與夏文汐有傾有講，更拿出手機合照。
夥拍發哥願免酬
問夏文汐是不是正與樂小姐傾復出大計？她說：「一半一半，順其自然，同佢之前係同事，好啱傾，有適合工作都會考慮。」復出是否想挑戰自己？她說：「睇劇本，最好做番自己，家有同導演傾劇本，下個月會決定，同新人及舊人合作，新人我欣賞陳偉霆同阿Sa，而發哥係我最鍾意嘅偶像。」
若與發哥合作可會不收酬勞？夏文汐說：「可以，但都要睇導演，家最緊要食好住好，冇壓力，最想攞獎。」是否最佳女主角？「係呀，想肯定自己。」
夏文汐透露復出工作將會拍電影，四、五月會成事，且恨攞獎恨到出口，她說；「我最細個女都15歲，佢哋叫我做嘢，之前都冇諗過復出，真係人算不如天算。」不過她不肯透露自己的年齡，她說：「我出去玩，好多人都唔相信我有３個女，我條腰24吋，因為我成日做gym跳舞。」此外，雷林靜儀昨日穿上一身AlexanderMcQueen示人，紀念她最愛的設計師。
採訪：羅慧敏
攝影：仇志德
小八卦：斑馬熱潮
日前李玟與熊黛林出席晚宴時，同場穿上JustCavalli的黑白斑馬紋的晚裝裙，而昨日夏文汐穿上的黑白斑馬圖案背心裙是德國時裝品牌Escada，三位靚女不約而同穿上斑馬紋圖案誰也不搶鏡，平分秋色。
