拆夥兩年的Twins正式合體，鍾欣桐（阿嬌）和蔡卓妍（阿Sa）昨日為下月兩場紅館騷舉行記招，兩人依然默契十足。提到網上瘋傳被指是黃長發的床照，阿嬌表示不知情，還反問記者：「黃長發邊個嚟o架？」
鍾欣桐08年因淫照風暴與蔡卓妍無奈分家，至近日Twins再度合體。昨日阿嬌和阿Sa在紅磡一酒店舉行記者會，宣佈下月16至17日在紅館舉行兩場《Twins人人彈起2010演唱會》，大會安排她們乘坐一輛掛有「TWINS」假車牌的開篷波子出場，但據法律界人士稱，原來掛假車牌的車輛於道路上行駛，已有違反香港法例第374章道路交通條例第八條之嫌，若無合理解釋，最高可判罰款2,000港元。
提緋聞互相救駕
記者會上阿Sa和阿嬌合唱《風箏與風》及新歌《人人彈起》，阿嬌有些微走音及不夠氣。司儀王祖藍指Twins睇住fans大，阿嬌開口及着脷：「佢哋都睇住我哋老。」阿Sa即兜番：「我好後生，得27歲。」開騷會否請嘉賓？阿嬌又亂噏：「佢係虎（阿Sa），我係豹，台上加多條龍，祖兒應承睇兩場，到時可能拉埋佢上台。」
記者笑阿Sa不要請男友Ronald（鄭中基）坐山頂位，以便邀他上台做嘉賓，她聞言一臉尷尬，阿嬌即護駕：「邊個Ronald？」阿Sa則說：「佢嚟先算。」阿嬌舊愛麥浚龍（Juno）自爆精神壓力大要睇醫生，阿Sa馬上解圍搶答：「叫佢保重。」阿嬌勉強一笑說「希望人人健康。」
硬銷舞台彈得起
被指是黃長發的淫照在網上瘋傳震驚娛圈，阿嬌表現得一無所知，反問記者：「黃長發邊個嚟o架？」在旁經理人霍汶希打圓場說：「放過佢哋一次啦！講其他啦。」並將話題拉到演唱會上，阿Sa謂會出現個全亞洲首個彈得起的舞台，又謂Twins一如樂與怒neverdie，笑言「有得開死都要開。」
採訪：馬建華 攝影：仇志德
