對於大部份人嚟講，揸私家車都喺用嚟代步，載住屋企人或者自己四周圍去。當然，亦有愛車之人視為大人嘅「玩具」，唔單止講求速度快、馬力大，更要型爆行先。唔同類型嘅車有唔同嘅型法，所以一架滿足唔到，就買多幾架，好似班英格蘭國腳咁，將靚車視為收藏品。
朗尼玩轉19架靚車
正如英格蘭領隊卡比路所講：「家嘅英格蘭國腳，個個都係暴發戶！」對於佢哋嚟講，買靚車等同買「玩具」咁易，唔使理幾多錢，最緊要就係型同靚，襯得起自己嘅球星身份；而眾多英格蘭國腳當中，碧咸就成為「車王」。呢位億萬身價嘅「萬人迷」原來擁有大約40部之多嘅名車，冠絕英軍；最新嘅「收藏品」包括勞斯萊斯、保時捷同大Jeep，全部都有台型，同碧咸絕對襯絕。
至於周薪10萬鎊（約117萬港元）嘅朗尼，雖然同老婆高蓮周不時用優惠券又食老麥，但作為曼聯球星點都唔會揸架「錢七」咁寒酸。呢位近期喺紅魔人氣盛極嘅射手，過去6年就曾經擁有過19架靚車，有過嘅名車包括寶馬M3、雅士頓馬田（AstonMartin）、平治、林寶堅尼同保時捷。不過，同碧咸比較，朗尼已經真係算揸車揸得慳過人，平均每年有3部車，以佢嘅身價算係唔過份。
剛被卡比路褫奪國家隊隊長臂章嘅泰利，平時賭錢都大大注，之但係勝在喺車仔人工高，周薪成15萬鎊（約175萬港元），所以依然有大把錢買靚車代步，但就唔係瘋狂一族，暫時只有AstonMartin、RoverSport、寶馬X5同保時捷911Turbo版4架。
不過，到咗6月世盃決賽周，呢班英軍球星就要暫時放低名車，守紀律坐大會專用大巴出入球場同酒店爭盃；而日前友賽埃及時出任隊長嘅謝拉特，就率先響應卡比路要求球員老婆到時要住離大軍較遠嘅酒店嘅指示，話打到入4強先叫老婆飛去南非支持佢，果真識做。