3D電影《阿凡達》喺香港大收1.6億嘅效應帶動下，今年3D電影多到有15部，業界預料3D電影總票房會打破舊年嘅2億元收益。咁大巿場，最先將戲院數碼化嘅院商洲立影藝梗係唔執輸啦，一擲逾百萬元，為全港首間戲院買咗Sony嘅全新4K數碼電影投影機SRX-RS2，今日喺旗下MCLJP銅鑼灣戲院全球同步首播3D《愛麗絲夢遊仙境》，票價85蚊至110蚊。
呢部4K機有幾巴閉？洲立集團總經理黃儀潔Grace話，一般影院播放3D電影嘅只係2K數碼播放系統，呢部係4K系統，解像度高達4096×2160（等於8.8百萬像素），比2K高出四倍，令立體畫面更流暢穩定，畫質更細緻，眼睛長時間睇都唔會攰。
長時間睇都唔攰
賣花梗係讚花香，小妹噚日率先試睇4K播放《愛麗絲夢遊仙境》，雖然係17米×7.3米高嘅巨幕播放，啲畫面好幼細，愛麗絲嘅大頭纖毫畢現，立體感十足，仲睇得好舒服，唔覺攰。
Sony嘅商業及專業設備亞太總部巿場經理Matthew話，4K舊年推出全球賣咗1,000部，但隨住3D電影大熱，今年預訂咗11,000部。
Grace話，現正商討喺3D影院播體育節目等嘅版權問題，今年6月南非世界盃，公司都好想播到3D賽事。如果成事，本港球迷真係開心死，唔使剩係睇有線。
電郵：mailto:[email protected]