澳洲廚師T浪跡江湖，周圍搵到食，自得其樂，有一技傍身，兼且識講英文、德文、希臘文，就有呢個優勢。佢曾經返回希臘尋根，住過三個月，發覺雅典污染擠塞吵鬧兼而有之，急急逃離；住在鄉間，好則好矣，又嫌設施落後，追唔上時代，所以決定以後都唔返家鄉定居，佢話：「最好都係亞洲，住香港最過癮。」外國人鍾意香港，一啲都唔奇，何止廚師T，前美國駐華大使雷德退任後，咪又係住在香港，不回美國。問廚師T：「地中海菜有何特色？」佢話：「特色就係新鮮、原味，盡量少用人工配料，不尚濃郁，近年好受歡迎，因為夠健康吖嘛！」好，聽佢咁講，由三月一日起到三月十九日呢三個禮拜，盡量搵一日去佢間餐廳試吓，餐餐在外吃，要兼顧吓健康，避免吓肥膩嘢先。
分手後碰到醫生C，問起佢健康食譜，如何減肥，佢哈哈笑：「運動冇用o架，我有一位病人，好鬼肥，點知因事入咗赤柱，一年後出返嚟，成個瘦佬款，佢話在裏面冇乜運動，只係啲食物份量令佢減肥啫。佢現在又試肥肥白白，恢復舊觀嘞，所以話，食物決定肥瘦，你想減肥，最好跟營養師商量，節制食量。」入赤柱減肥，冇人肯制嘅啫，但強制式節食，又有幾多人有恒心、有意志呢？臨別前，醒起李少光局長見記者講學校濫藥，情況嚴重，如學生唔肯在學校驗尿，家長會唔會私底下搵私家醫生檢驗？醫生C話：「梗係有啦，一啲富裕家庭學生在學校染上索K癮，家長捉學生上嚟驗尿，啲男生最初好抗拒，但聽我一講，面色大變，乖乖哋接受檢查與治療。」講乜說話會令男生馴若羔羊呀？醫生C話：「富裕青少年男生索得K時亦會到蘭桂坊媾女，媾女想做乜？心照啦，但索K與濫藥會導致無論任何年紀嘅男士性無能，十幾歲就唔得，以後點樣過世？所以啲男生上到嚟，一聽我講就軟晒。」原來如此，一啲香煙包既然都印上類似標語，可唔可以在學校，特別係男校大力宣傳呢一點呢？既然學校濫藥嚴重，教育局在宣傳方面要大膽啲至得！