未到驚蟄，本報提早走訪鵝頸橋底的專業打小人團隊，首先當然是問價。據悉幾位長駐橋底的高手集體決定，舊年經濟不佳，要與民共患難，急市民所急，不能加價。今年白虎年，打小人的道具之一正是黃色紙老虎，既然財爺慷慨派糖，證明經濟寒冬已過，打小人一年一度，正日加一，天經地義，多收五成也不屬於天價吧。各位貴客，只要付出六十大元，這批街頭神婆就會交足戲，手起鞋落，下下到肉。
打小人不同擦鞋檔，有冇領打手牌呢？報上介紹兩位阿婆，打小人最高資歷只係八年，那麼六十歲前，阿婆靠什麼過日辰？能在六十多歲轉工跳槽，成功當上自僱人士，足證阿婆比八九十後充滿正能量，絕不迷惘。歲月只能偷走阿婆的完美肌膚，但偷不掉擱在橋底的觀音/齊天大聖神壇。阿婆老矣，但打小人不是夕陽工業，有人的地方，就有政治，搞是非。打小人真真正正是本土創意產業，明明當着你面只是打空氣和石屎地，並無秘技可言，照樣吸引老中青擁躉，深信阿婆那塊打小人四寶之一的肥豬肉，會比香蕉皮更跣，撻懵你個仇家死對頭。靈唔靈呢？睇曾特首與麥兜crossover，明白晒。