隨住世界盃決賽周仲有3個幾月就到，各國嘅世盃最新戰衣亦相繼面世，而周三國際賽日，可以話係show新波衫嘅高峯日子。
身為世界冠軍嘅意大利，今日友賽喀麥隆之前，已經喺發佈會上展示咗新戰衣，仲搵咗隊長簡拿華路宣傳，波衫嘅主色，仍然係傳統嘅藍色同白色，最重要當然係胸口位中間有個世界盃冠軍嘅徽章，完全獨有。
至於英格蘭對埃及雖然喺溫布萊主場上演，但預計英軍成員會着起全新推出嘅紅色作客波衫，希望幫呢件以66年贏世盃設計為藍本嘅球衣造勢。
其實，「一剔」早前先喺倫敦公佈一系列佢哋贊助嘅世盃球隊新波衫，預計亦會喺今日正式面世，同「三間」陣營交鋒，球迷睇啱就快啲入手支持愛隊喇。