昨日全靠內銀股力撐，否則以滙控（005）派完成績表後呢款跌幅，港股唔跌超過200點至奇，好在此消彼長之下，港股總算唔使跌得太多，只跌150點；不過大市成交受滙控沽壓影響，增至720億元。
滙控裂口式下挫，散戶對其後市睇法各異，有人話唔好再對滙控抱咁大期望，逢高就要沽；亦有人認為急跌後會急升，可撈底。從技術上睇，出現大裂口下跌，又有大成交配合，股價一般唔會咁快重返高位。
內地通脹壓力升溫，豬肉價格上升，呢一點對雨潤食品（1068）好壞參半，事關豬肉價升，若然其肉製品未能加價，將成本轉嫁消費者，則對雨潤不利。但家陣雨潤上游業務佔其盈利比重日增，足可抵銷下游業務壓力，相信豬肉加價一樣可令雨潤受惠。
雨潤昨跌0.10元，收報22.60元。今年以來，該股約在21元至25元之間上落，基本上屬上落市格局。內地通脹升溫，雨潤可藉通脹話題炒作，22元邊可買，中線目標睇28元。
方星俠