皇家馬德里未必係至勁嘅球會，但肯定最搵錢。喺著名會計師樓《德勤》公佈嘅08/09球季最富有球會排行榜，呢支西甲球隊連續第5年做「1哥」，仲成為首支可以喺一季之內搵到超過4億歐元嘅球隊；不過最令人意外，竟然係阿仙奴爬過車路士排第5，睇嚟佢哋嘅財技真係有番咁上下。
歐元勢勁 巴塞皇馬嗒糖
《德勤》呢份報告，係按照球會透過門票收入、贊助、商品及其他商業收入、電視轉播，同埋出租球場作私人或商業用途搵返嚟嘅錢，再計算佢哋喺一季賺幾多。結果1、2位都係嚟自西甲，分別係皇馬同巴塞，前者上年度搵咗折合港紙約42億5,500萬（4億零140萬歐元），後者就有近38億8千萬，取代咗原來第2位嘅曼聯。
西甲雙雄搵咁多，全因佢哋唔係好似英超咁，電視轉播權係分餅仔，可以獨立將個轉播權賣畀電視台，所以喺呢方面好搵好多；報告嘅發言人丹鍾斯話：「上季歐洲同西班牙經濟都唔好，但皇馬喺收入方面仲有10%增長，而淨係喺電視轉播，佢哋就執咗1億6,100萬歐元（約17億港紙）。」其次就係，歐元強英鎊弱亦令皇馬同巴塞財富大增，但如果按照07年6月嘅匯率，排第1嘅應該係家陣位列第3嘅曼聯。
阿仙奴靠新場勁多收入
至於英超Big4其餘3隊阿仙奴、車路士同埋利物浦就排5至7位。阿仙奴喺舊年嘅報告排第6，但今年居然可以超越車仔，同佢哋換咗去阿聯酋球場好有關。阿聯酋球場可以坐6萬人，加埋上季佢哋喺歐聯打入4強，同埋喺比賽以外嘅時間將個場猛咁租出去，淨係門票收入同收租都執唔少。事實上，兵工廠向來妥善理財，舊年盤數仲勁靚，截至11月尾嘅前6個月，稅前盈利有成4億1,500萬港紙，所以我求大俠對於佢哋可以爬過車仔頭，一啲都唔覺意外。
不過呢份報告未計支出，所以皇馬可能只係表面風光，尤其喺去年夏天用高價簽卡卡同埋基斯坦奴朗拿度，隨時係左手嚟右手去，最終盈利可能得番好少。
全球最富有球會
1（1）皇家馬德里：42億5,500萬
2（3）巴塞隆拿：38億7,800萬
3（2）曼聯：34億6,600萬
4（4）拜仁慕尼黑：30億6,800萬
5（6）阿仙奴：27億8,700萬
6（5）車路士：25億6,800萬
7（8）利物浦：23億
8（11）祖雲達斯：21億5,400萬
9（10）國際米蘭：20億8,290萬
10（7）AC米蘭：20億8,290萬
資料來源：《德勤》會計師樓
註：（）為去年排名
收入以港元計