警犬奀豬（安琪）早前忽然「離家出走」，令警方十分緊張，好多市民都擔心奀豬有事，好彩幾日後，終於喺九華徑搵番佢，謝天謝地。
最新一期《警聲》報道奀豬近況，透露市民搵到奀豬時，奀豬飢寒交迫，前肢仲有輕微受傷，不過活動自如，健康冇大礙。《警聲》冇交代奀豬失蹤期間去向，十分保障其私隱，亦冇講奀豬係咪要接受紀律處分或內部調查。
暫未能復職
不過奀豬暫未能復職，仍要隔離一段時間同休息，稍後先至可以出更執行任務，如果有需要，奀豬要再接受訓練。走失警犬回歸警隊，有人卻要離開呢個大家庭，行動處處長古樹鴻榮休在即，早前主持機動部隊結業禮。
古樹鴻話任內最難忘係05年世貿會議與來港示威韓農嘅一役，當日韓農勢如破竹攻近會場，八方歷歷在目，古Sir猶記心頭可以理解。當時好多警員受傷入院，古Sir指佢哋本來可以放病假休息，但都堅持返回崗位，佢覺得好值得敬佩。