iPhone世界千奇百趣，全世界超過10萬個Apps，梗有一個啱你，要食飯有GPRS地圖、要買股票有免費報價，甚至想瞞住老婆偷食，亦有TigerText軟件，可以將你同外遇嘅情慾對話洗得一乾二淨。呢個程式就好似電影入面特務收到嘅秘密任務，一睇完就會爆炸，肯定唔會斷正畀老婆知。
當某大電訊商推出iPhone後，搭地鐵時梗有一部喺左近，有用開就知，呢個肯定係未來世界嘅重點，將會由WEB慢慢轉往手機，用家依賴性越大，手機相關行業股前景越看俏。行內人話，突然間多咗好多公司要寫iPhoneApps扮潮，開發商接生意接到手軟，可見熱潮一爆發，傳播力係幾咁勁，情況就有如當年Facebook熱潮席捲全球，最終吸引微軟喺07年豪花2.4億美元入股。
摩比睇高一線
統計顯示，截至去年12月，美國人最鍾意上Google，有多達1.73億人，增加16%；Facebook仲勁，增加1倍至1.1億人，可見社交網正主導市場。當所有嘢都可以搬落手機，他日可以玩埋「開心農莊」同「德州撲克」時，下一代嘅人生活模式將再革命性轉變，大人小朋友都「飯來張口，機不離手」。
蘋果已成為公敵，Google正以Android反擊，而早前全球24家網絡供應商亦宣佈，聯合成立手機應用程式平台，希望從蘋果手上攞番市場主導權。各手機商都加入反蘋果，包括全球第二大嘅三星、新力都會大力發展智能手機。不過，現時全球智能手機市場仍由諾基亞（39%）、RIM（Blackberry）及蘋果（14%）三分天下。
手機製造商爭餐死，漁人得利係設備供應商，所以京信通信（2342）可以不時發盈喜、派紅股。同樣做天線嘅仲有半新股摩比發展（947），做嘅野同京信相差無幾，而且佢係中興通訊（763）上游，股價大落後，京信都盈喜，冇理由摩比業績差。股價喺3.20元收集咗一段時間，短炒蟹貨亦已消化唔少，若能突破橫行區頂部3.45元，可睇高一線望3.70元。
胡孟青