組合24味一向敢言，佢哋不時都會借歌曲諷刺時弊同埋寸盡娛樂圈，噚日佢哋就到商台接受訪問，順道宣傳佢哋最新派台歌《DoYouKnowMe》，當中嘅歌詞仲句句有骨。
不屑賣無綫賬
除咗寸無綫高層陳志雲照顧農夫外，又直言唔會睇無綫台戲「我硬頸唔認命，唔肯睇佢哋台戲……上飯局，食焗飯，呃老闆話唔得閒，實情係約咗馬士達米歐陽靖同埋生番，一齊黐餐吳彥祖爭住幫我哋埋單」，仲借歌詞「我上youtube睇張如城都唔肯試聽傳穎」嚟寸經常被人批評歌喉嘅傅穎吸引度不如張如城。
對於寸盡無綫同陳總，24味成員阿肥就強調大家可以對號入座，至於新歌會唔會喺無綫播時，佢就不屑話：「佢鍾意播就播，唔需要求佢播，佢唔播亦都唔關我事。」提到歌詞有提及唔少明星時，當中包括傅穎，阿肥即抵死反問話：「嗰啲係星咩？」身旁嘅陳子聰就一頭霧水問記者傅穎係唔係香水名，阿肥即插嘴話傅穎只係娛樂圈嘅人物，記者問佢意思係唔係話傅穎只係識娛樂大家時，24味即補鑊話：「咁我哋都係娛樂大家。」