【本報訊】公民黨及社民連的五區公投運動如箭在弦，天主教香港教區榮休主教陳日君樞機表明，5月16日投票日早上將由羅馬趕回香港，投下歷史性的一票，向假普選說不，向不民主的制度說不。對於特首曾蔭權企圖帶頭杯葛普選，陳日君認為是意料中事，直言「唔使理佢」，今次運動全民都要參與，「唔可以俾佢輸！」
記者：張嘉雯
陳日君昨日出席中文大學崇基學院一活動後表示，5月16日公投日他本來身在羅馬，但會乘早機回港投下神聖一票，「我特登從羅馬返嚟，本來有個節目我都犧牲，特登返嚟投票。」他強調公投意義重大，需要全民參與，「唔可以讓佢輸o架，唔可以俾佢輸o架，好緊要o架嘛，咁難得嘅機會畀大家表達吓，表達我哋好心急呀，要普選囉，要肯定佢哋應承嘅真普選囉。」
「大家好良善好有紀律」
對於曾蔭權及左派領導帶頭不投票，企圖杯葛行動，陳日君直言心裏有數，「都知道佢哋會咁做o架啦，唔使理佢啦。」他希望更多巿民投票支持，「我特登（從羅馬）返嚟就係為咗鼓勵巿民。」
他在崇基學院的公開講座提及和平的意義，認為每個團體都需要秩序，需要人去管理，民主制度雖然不能解決一切問題，但比獨裁制度更為可取，「管理係一種服務，權力係為服務，如果權力係由人民賦予，係由天主畀佢，我哋都應該支持同參與；君主制度喺某時某地係好，但人類進步緊，好多人都受過教育，點解要俾某啲人話晒事？」陳日君認為本港條件成熟，早應落實普選，「一個地方得一個人話事係好危險，一定要爭取民主，香港有好成熟嘅人民，大家好良善，好有紀律，邊有一個地方有50萬人遊行而一塊玻璃都冇打爛呢？我哋好應該有民主。」
「追求公義時要有勇氣」
他又指，每個人都有資格締造和平，使強權了解真理，幫弱勢爭取權利，「唔可以成日擔心自己有損失，咁樣就做唔到，要放棄自己，尋求團體和諧。」
陳日君相信，要推翻不公義的制度極為困難，途中亦可能遇到挫折，他引用聖經《出谷紀》中梅瑟向埃及王抗議，結果埃及王不忿報復，加倍奴役以色列人民的故事，鼓勵巿民和信徒，「當時啲人怪責梅瑟，累佢哋受懲罰，但佢哋最終會見到光明，所以我鼓勵大家，接受眼前嘅挫折，追求公義嘅時候除咗要有純正嘅意向同策略，仲要有勇氣。」