末世互揪北斗爆頭

無雙系列出得好濫，戰國、三國濫到有時真係分唔到係新定舊。不過，呢劑無得走，因為佢掛上北斗牌頭！曾經喺網上投票，成為最想「無雙化」嘅作品，千呼萬喚光榮喺今個月終於推出《北斗無雙》，通街都係嘍囉等拳四郎逐個同佢哋爆頭，最強奧義再現眼前，北斗Fans呢次飽咯！

文：阿洛

特典！你已經醒了！

北斗呢廿幾年嚟出過唔少Game，但相信除咗以前街機打拳墊之外，無雙玩法應該係最啱Feel！廠商亦睇準大家嗰份情意結，除普通版外，仲會推出「初回特典」同「寶箱特典」。
「初回特典」除有特製金屬卡片盒外，最正係送埋可以將拳四郎服裝，更換為原作漫畫版造型嘅下載兌換碼。而「寶箱特典」仲正，送配樂CD、插畫集外，仲有個鬧鐘，鬧鐘有三種響聲，其中一種就係拳四郎出拳嘅叫聲：「呀打打打打打打……」，朝朝打醒你都咪話唔過癮！

亂舞百裂拳

1983年開始連載嘅北斗之拳，個古仔大家應該都好熟，以核戰浩劫後的末日世界為舞台，簡單啲講都係打打殺殺同打打殺殺，總之就係男人嘅浪漫啦。
今次隻Game貫徹無雙爽快系統，大量敵人任你打，角色背景跟足原著，更加咗新意思，就係除咗齋打之外，仲可以舉起敵人折磨佢，而且仲可以用背景嘅石像等轟向敵陣；當然更加唔少得北斗之拳各種絕招，北斗百裂拳等奧義會化身成「無雙亂舞」，血腥味濃郁，好啱我呀！

大量角色可用

遊戲分為「傳說篇」同「幻鬥篇」，「傳說篇」就跟足原著故事發展，用傳承千年嘅北斗神拳打到最後拳王雷奧令人回味無窮！而「幻鬥篇」就滿足貪心人，除主角拳四郎外，仲可以用南斗六聖拳尼爾、北斗各師兄弟等強手，另外亦有女角如瑪莉亞等可以用，而且仲有原創招式登場，玩家可以體驗原作感受唔到嘅夢幻對決，耐玩性就更有保證！