警隊網頁噚日改版，首頁增加咗比較多人關心嘅資料，包括警察招募、交通事項等，警方話希望更新版面設計後，向市民提供一按式「捷徑」直接連結到有關內容，畀使用者更快捷地得到所需資訊。網頁亦增加咗唔少新內容，「讚揚警務人員」欄目就擺喺顯眼位置，將市民表揚、感謝警員資料公開，洗底味濃。
另一項新內容係增設「趣味角」，入面有與警隊有關嘅歌曲鈴聲、遊戲、電腦背景牆紙、剪紙警車等小玩意供免費下載，警方相信能夠吸引更多年輕人瀏覽，呢啲嘢，吸引到80後、90後？反而另一項內容似乎比較有趣，就係介紹警犬隊嘅「警犬知多啲」，圖文並茂介紹多隻警犬，可惜冇早前一度失蹤嘅Antje。