創造歷史，就在此刻，不滿民建聯嘅人，多個月前喺facebook發起「我相信可以召集100,000個厭惡民建聯的人！」呢個group前年開設，舊年加入人數驟增，反高鐵抗爭最熱烈嗰幾日，群組成員每日新增1萬人，點知到2月初群組突然消失，令無數網民嘩然。
網民質疑fb政治打壓，隨即另立同名新group，截至噚晚已有逾99,700人加入，10萬大關在望，勁多網民熱切期待歷史時刻來臨，紛紛倒數仲有幾多人才達標，希望親身見證10萬人厭惡黨誕生，八方旁觀都十分緊張。
或刊廣告提醒惡黨
創立群組嘅Kelvin同八方講，當群組達到10萬人後，會喺網上發表宣言，再次說明設群組目的，就為希望揚言係香港第一大黨嘅民建聯，要真正面向市民，一味保皇嘅話可能唔止遭10萬人唾棄。Kelvin透露，稍後可能會在報章刊登廣告「提醒」民建聯已有10萬人表態厭惡佢哋，日後可能成立小組監察民建聯舉動。