今季英超第4名爭崩頭，家陣熱刺可以壓住利物浦、曼城同埋阿士東維拉而暫居第4位，而佢哋靠嘅人，唔係迪科爾或者高治，竟然係差啲俾領隊哈利列納搞到儍吓儍吓嘅俄羅斯前鋒柏夫里約真高。
現年28歲嘅柏夫里約真高喺熱刺屬於前朝餘孽，係前領隊拉莫斯喺前年8月由莫斯科斯巴達用1,380萬鎊（約1.6億港元）買佢返嚟。當哈利列納喺前年10月上場後，先後購入迪科爾、羅比堅尼同埋高治，於是佢亦冇運行，喺聯賽長坐冷板，淨係可以間中踢盃賽。舊年夏天有球會想簽佢，但哈利列納嫌人出手低而拒絕賣佢；而到冬天嘅轉市場，哈利列納亦講明唔准佢轉會。
每66分鐘入1球冠英超
柏夫里約真高當時咁同傳媒哭訴：「哈利列納唔放我落場，但又唔准我轉會，擺明想玩殘我。」柏夫里約真高嘅經理人阿迪莫夫都話，柏夫里約真高喺倫敦住唔慣，經已覺得好辛苦；加埋喺熱刺咁唔如意，所以似乎有啲抑鬱，再咁落去遲早會儍。
但「儍人有儍福」，羅比堅尼因紀律問題流放到蘇超些路迪，新借返嚟嘅古莊臣又冇料到；加埋另一高佬高治鬧入球荒，所以柏夫里約真高終於有機會一展身手。佢又夠晒爭氣，連埋前日贏愛華頓入1球，近3場入咗5球，今季踢11場入7球，平均每66分鐘就入1球，係全英效率最高的前鋒；仲勁過車路士嘅杜奧巴（平均每101分鐘入1球）同埋曼聯嘅朗尼（平均每105分鐘入1球）。
領隊列納轉口風捧佢
柏夫里約真高入球停不了，家成為白鹿徑嘅寵兒，哈利列納見對方強勢亦即時轉口風，話一早就睇好佢。佢咁講：「柏夫里約真高喺度前途無限。查實我哋可以喺季中賣走佢，但冇咁做到。我同主席講想留用佢，因為佢對隊波好有用。果然不出我所料，佢真係掂o架！」
但哈利列納都不忘暗寸柏夫里約真高幾句：「佢終於有機會一展身手啦，而佢把握得到。命運掌握係佢自己手裏，希望佢之後繼續有好表現啦！」家曼城同利物浦個勢都好勁，實力亦好，熱刺要爭第4，呢個「儍」鋒真係唔少得。
爭「4哥」球隊逐隊睇
熱刺
英超排名：4
成績：28戰得49分
前4賠率：5倍
曼城
英超排名：5
成績：27戰得49分
前4賠率：2.75倍
利物浦
英超排名：6
成績：28戰得48分
前4賠率：2.5倍
阿士東維拉
英超排名：7
成績：26戰得45分
前4賠率：5倍
賠率來源：BETFRED