民望低殘嘅特首煲呔似乎真係出現恐懼群眾症候群症狀，凡係人多地方都不敢久留，去茶餐廳要鬼鬼祟祟，過年前更打破慣例唔去維園年宵市場，改到沙田行花市，無非都係唔想見到反煲呔物品。嚟緊星期日3月7號禮賓府開放日，煲呔聽日去北京列席人大會議開幕禮後，安排7號至10號放四日假，當市民遊覽禮賓府之際，佢卻唔與民同樂反而擺空城計，無奈有家歸不得，難怪話「回家真好」。
網民發起玩快閃抗爭
早前爆出有家務員私下帶親友玩轉禮賓府，BBQ後直闖貴賓廳、大禮堂，登堂入室暢遊廁所、廚房、錦鯉池，原來禮賓府咁好玩，搞到好多人渴望見識吓呢啲重地，仲四出尋求在禮賓府BBQ嘅訂場途徑，今次開放日政府首次安排免費導賞服務，有機會大開眼界啦。大家且慢高興，官方導賞員只會帶大家遊花園，介紹禮賓府歷史、建築特色同各式花卉，想在禮賓府燒嘢食？餵錦鯉？睇吓煲呔喺沙田年宵市場買嘅禮賓虎？你識唔識得人喺入面做先？！
唔好話八方唔提醒大家，煲呔絕對親疏有別，冇佢或者佢寵信嘅家務員批准，喺禮賓府內擅闖禁地係好「激進」行為，而警方對付「激進」分子係絕不手軟，所以大家入到禮賓府真係要步步為營，行差踏錯後果自負，加上去年11月中禮賓府開放日，30個網民入內成功展示「當奴下台」T恤，無聲抗議煲呔政府，因此有理由相信，表面上係導遊嘅導賞員，分分鐘另有特殊任務。
八方收到風，已有人喺網上低調發起另類遊覽禮賓府行動，其中一個構思係大家着上唔同顏色嘅衫入去玩快閃捉迷藏遊戲，令禮賓府內七彩繽紛，象徵向政府「還以彩色」，抗議秋後算賬喺特區搞白色恐怖，由於活動主旨係拒絕黑色暴政，所以大前提係守規矩不搞破壞，不動手動腳也不採摘花朵，其他活動形式可以自由發揮，大家盡情玩鋪勁，繼續快樂抗爭。
mailto:[email protected]