滙豐控股（005）業績令人失望，行政總裁紀勤人工沒有大幅增加，花紅亦只係派股，而且未來幾年都會捐作慈善用途。大行合奏個個跌眼鏡，連第4季息都只係加少少，但要讚吓管理層，唔攞Bonus都加員工薪，係有良心嘅表現。
大市調整任務終於完成，周線圖上出現雙底反彈，即係話中線分析，平貨區喺19400底部，23000係橫行區頂阻力，投資者唔好因為一日嘅大升市而有過份憧憬。大市仲有一關要過，就係家疑似嘅下降軌，頂部喺21600，短期內升穿先係真正脫險，大圓頂將變身調整底。
呢浸調整浪，低位敢撈底嘅老散唔多，人人「二仔底」心大心細，直至上番21000先放心買入，特別係啲超跌又有好息嘅股份，買盤就更加積極。因此，大家會發覺唔少股份形態突然由「二仔底」變「鑊仔底」，部份更升穿鑊耳仔，發出火辣辣嘅落鑊炒作訊號。先落鑊嘅係內銀股，終於補晒啲裂口位。資金炒落後，內房成交旺晒，龍頭中國海外（688）鑊仔更圓更靚，似足一彎新月。
上實有齊內需世博概念
滙控業績炒完，上月底同大家講過上海世博概念股，終於都畀面升吓，特別係上海實業（363），250日線守穩後上20日線，聽落好似好易，其實只係因為20日線跌落嚟就佢。上實旗下有滬寧高速公路、地產、酒店、醫藥等，世博內需概念有齊，股價跌到殘，息率仍近3%，唔差得過唔肯大加派息嘅滙控好多，具防守性。
資金買到冇嘢好買，連二三線好多早被遺忘嘅優質股都唔放過，上市後陰乾嘅寶龍地產（1238）終於有啲生氣，買盤下晝殺到。一直欠利好消息嘅佢，公佈1月錄得1.4億元（人民幣．下同）銷售額，賣咗1.3萬平方米樓面。睇完通告會問咁即係點？賺多定賺少？火滾睇番招股書，過去兩年每平方米買入成本平均唔過600元，卻以高價近3800元賣出。咁1.3萬平方米賣到1.4億元，咪即係每平方米賣成萬蚊？有冇咁筍！業績時即管睇實。
胡孟青