行政會議召集人梁振英噚日又再蒲頭，到公開大學出席「與學生真情對話」活動，可惜佢遲到，受到學生鴉雀無聲冷待。佢試圖補鑊，搞氣氛問學生有乜問題，點知逾200名學生冇乜人有興趣提問，幸好兩名好心老師舉手，先至令梁召集人冇咁尷尬。
《讀者文摘》調查顯示香港人對梁振英信任度甚低，難怪冇人提問，可能覺得佢答咗都信唔過，梁召集人惟有將原定20分鐘發言時間拉布至40分鐘，八方現場所見，唔少學生把握機會瞓覺休息。
身兼城大校董會主席嘅梁振英又透露，本來想拒絕政府批出馬鞍山白石土地興建宿舍，因為距離城大太遠，但政府畀唔到另一個地點選擇，惟有硬啃。