全城焦點在滙控（005）成績表，滙控一直唔係星俠杯茶，不過市場對佢有憧憬，加上幾隻重磅內銀股造好，建行（939）及工行（1398）升4-5%，帶動恒指噚日大升448點，收報21056。
內銀股當炒，內房股都唔可以走雞，整個板塊昨俱見炒上，其中以中渝置地（1224）最勁，急升8.6%，收3.25元。
大市重返21000水平，只要企得穩，後市將由好友主導，問題係業績期大市成交有冇突破，大家要特別留意呢一點。
今年炒消費股肯定切合市場大主題，好似上個月國務院「一號文件」出台，其中有關農村發展基礎意見當中，有唔少都脗合亨泰（197）旗下農業種植及冷凍鏈產品物流業務，可謂受惠國策。
亨泰股價於0.70元至0.77元橫行逾月，整固時間已足夠，昨日開始見異動，抽升2.7%，收報0.76元，作勢升破一個月高位，展開新升浪，不妨伺機跟進，相信股價升破52周高位0.94元，唔使好耐時間。
方星俠