打機係唔少打工仔嘅最愛玩意，而喺場上威風八面嘅NBA球員，唔少都係打機狂迷，好似養緊傷嘅姚明都不時上網打機。而一間籃球遊戲製造商為咗滿足球星需要，就特製咗一個「喼」（左圖），入面有齊螢幕、手掣、遙控器等，畀班星級球員出外打客仗時，可以喺飛機玩餐飽；搞到班球星個個都「喼」不離身，變晒「喼神」。
《2K10》封面嘅湖人球星拜恩（圖）就話，自己好鍾意打機，仲自封喺game入面成個英國特務占士邦《007》咁，真係誇張。而我求大俠覺得最好笑係公牛嘅戴歷路斯，佢話自己唔會用公牛隊，皆因個game設計到佢嘅投籃好差，所以轉用金塊，真係神奇！