仲有一個月就係復活節長假期，唔少朋友都問小妹有乜新旅遊景點好介紹，小妹推介大家不妨考慮去台灣金門旅遊，連國家主席胡錦濤早排去廈門視察，都話想到呢個最接近中國大陸嘅台灣島嶼玩吓。
由古老大宅改建
金門除咗係台灣重要軍事據點外，島上亦有唔少具歷史價值嘅旅遊景點同文物值得參觀，3月又係當地旅遊季節，旅客可以觀賞候鳥，仲可以入住由台灣政府資助修葺，然後開放畀旅客住宿嘅古老大宅改建嘅民宿，當地人叫呢啲大宅做古厝（音措），最重要係呢類古厝民宿一般房租便宜。
好似位於金城鎮金水里前水頭29號嘅「博士的家」咁，係一間充滿歐洲古色古香嘅大宅，有4間雙人房，每晚房租1,400元至1,600元新台幣（約350至400港元），民宿主人係一位機械博士，提早退休後到金門長住，佢仲可以幫住客規劃行程，甚至做埋嚮導，可電郵查詢：[email protected]。
另一間位於金城鎮前水頭86號嘅「水頭觀星」，同擁有4間雙人房，每晚房租平日只需700元新台幣（約175港元），比起台灣另一旅遊熱點清境民宿吓吓每晚房租800至900港元計算，呢個價錢簡直係平靚正，聯絡電話082-375242。
不過，小妹提醒各位，唔少民宿要求訂房時候畀埋房租，但有個別民宿知道係香港人嘅話都會通融到達當日先至收錢，但各位就唔好放飛機，以免破壞香港旅客嘅名聲。
電郵：mailto:[email protected]