立法會主席曾鈺成同黨友葉國謙聯合辦事處噚日細屋搬大屋，由上環禧利街樓上舖搬去太平山街嘅兩層舖，好多司、局長都有現身祝賀，包括忙於為預算案四出解畫嘅財爺鬍鬚曾。
民建聯冇話明會支持工聯會王國興要求將五區補選費剔出預算案外嘅表決，已經算係幫鬍鬚曾一大把，鬍鬚曾當然幾忙都要到場以示感激，而且仲好體貼，致辭時話好開心曾主席嘅喜事一宗接一宗，祝願去年再婚嘅曾主席今年「開枝散葉」，令人無限聯想。
曾主席當然唔會拒絕鬍鬚曾一番好意，強調一定會「開」，開到18區都有，不過佢強調只係講緊開辦事處啫，大家無謂有太多聯想喎。