職業球員喺當打之年退休，大多數係因傷病所致，例如曼聯名將韋西迪（膝傷）同德國球員迪斯拿（抑鬱症）；但好似艾殊利高爾（A高）咁，因為偷食搞到唔想踢波，真係罕見。
現年29歲、效力車路士嘅英格蘭國腳左閘A高，雖則有靚女歌星老婆雪露，但佢仲唔滿足，不斷咁玩女人，仲俾英國傳媒爆大鑊。聽聞雪露終於頂唔順，決定同A高結束呢段唔夠4年嘅婚姻，仲到講明會同A高分身家；其中對佢哋位於薩里（Surrey）、市值350萬鎊嘅大屋，更加係志在必得。
自稱情緒好唔穩定
英國《星期日鏡報》報道，家陣喺法國接受緊足踝傷患治療嘅A高，同身邊朋友講，連串偷食報道除咗令佢婚姻破裂，仲搞到佢好亂同情緒好唔穩定，所以諗過離開球壇，等自己可以冷靜一下喎。
又難怪A高會咁諗，佢背妻偷食嘅醜聞被爆後，車仔老細阿巴莫域治同領隊安察洛堤都冇出嚟撐佢；油王仲話如有球員因行為失當而令會方形象受損，除咗罰款外，仲有可能被賣走。不過有小道消息話，油王雖則對外界咁講，但暗地裏畀咗好多支持A高，例如金錢同心理方面嘅輔導；而為咗挽救A高形象，車仔主席畢克已要求佢繼續作公開道歉，所以，真係唔明點解A高會有退休打算。
A高靠踢波致富，家陣喺車仔嘅年薪有成430萬鎊，佢若然退休就等於自斷米路；明明係自己一手破壞婚姻，但A高竟然想將自己身份由「兇手」變做「受害者」，話唔定佢只係想打同情牌。