「這是甘仔來到中國後這幾十年來的第一個『個唱』。」前黑鳥樂隊成員郭達年網上撰文，劈頭第一句咁樣介紹甘仔呢次破天荒嘅音樂會。
提起「甘仔」甘浩望神父，大家多數會諗起佢係一路關懷香港弱勢社群嘅社會行動者，但好少人想到佢原來都算係個singersongwriter，作咗唔少歌，仲鍾意自彈自唱。郭達年話，以前甘仔唔係喺抗議現場唱，就係喺晚會上唱，今次決定為佢辦一次音樂會，等佢唱晒自己啲歌。甘仔就用佢嘅意大利腔廣東話同八方講，既然朋友建議，咪試一次囉。
14首歌道出多年生活
甘仔決定唱14首歌：包括《我的慈父》、《DenterindelaBarca（艇上的）》、《L'e'Noster（屬於我們的）》、《廢除死刑》、《居留權小學之歌》等等，唱意大利文、法文、廣東話、普通話仲有西班牙話，唱親情、唱聖靈、唱生命、唱死亡、唱愛、唱公義、唱希望，講嘅其實係甘仔幾十年來嘅故事同生活。
甘仔細時入過米蘭大教堂詩歌班，大啲就喺修院學過吓結他。八方問郭達年點評價甘仔嘅音樂，郭達年話：「好嘅時候非常好。」
甘仔話，今次其實只係預朋友嚟聽，表演場地係葵興華發工業大廈一個單位，只容納到30人左右，想留位就要電郵去mailto:[email protected]。