四大唱片公司和無綫因版稅而反面，由去年拖到現在仍未解決，令四大歌手未能亮相無綫，契仔李克勤首當其衝曝光率驟減，惟有叠埋心水湊仔陪老婆待產，有苦自己知，但謝安琪（Kay）前晚卻寸克勤冇嘢撈，可以專心一意努力做湊仔公，又謂自己好忙，暫時沒有生育計劃，可謂大言不慚。
謝安琪前晚到柴灣出席「全港SmartTeens反吸毒Rap歌創作及作詞唱K大賽」，她身兼宣傳大使及比賽評判，同場還有MCJin及Kellyjackie擔任表演嘉賓。Kay表示當中有參賽者改編她的一曲《年度之歌》出賽，令她相當驚喜。
去年四大唱片公司和無綫因歌曲版稅問題鬧翻互相封殺，至今仍未解決，四大歌手未能亮相無綫，即使身為契仔的李克勤亦不能倖免，他亦曾經坦言曝光率及工作量驟減，迫於無奈惟有留家湊仔及陪待產的盧淑儀，但近日卻有傳有線出1,000萬，邀請克勤擔任世界盃主持。
「唔知佢咁鍾意湊仔」
對於這個消息，Kay說：「我唔知，新年都冇同克勤見過面，我冇諗過講波可以好過做歌手。」又有消息指克勤即將和唱片公司環球約滿，容祖兒出口表示想拉攏他加盟英皇，Kay聞言表示：「咁機密都知？人哋合約嘅嘢我真係唔知，克勤以往有喺唱歌度畀意見我，我都想同佢繼續同一間公司，但原來佢咁鍾意湊仔，真係唔知佢咁鍾意湊仔，佢應該做生產力促進局嘅代言人。」
問到Kay會否也想做生產力促進局代言人（即造人生BB）？她即笑說：「我冇咁叻，我好忙，暫時冇諗過生育計劃。」似暗寸克勤冇嘢撈清閒，可以有大把時間造人。
望Kelvin復出組孖K
另外，當日因承認服食毒品而被封殺的關楚耀（Kelvin），即將獲唱片公司放生復出，Kay表示仍未知是否屬實，但她透露日前Kelvin誤打電話給她，Kay說：「我當日接到Kelvin電話，但接聽時只聽到有人袋聲，收線後我再打畀佢，佢又冇聽。」
Kay表示Kelvin出事前兩人經常以「孖K」組合一同工作，之後再加多個孫耀威實行三人行，但之後改為二缺一，所以希望Kelvin復出一同演出。
採訪、攝影：何慧斯
