曾自嘲感情生活似沙漠般乾旱的鄭秀文（Sammi）昨日舉行7年以來首個簽唱會，除了慶祝演唱會DVD大賣15萬張外，又有忠心男歌迷在台上灑淚支持，令Sammi猶如久旱逢甘露，還大呼冧爆想結婚。
鄭秀文昨日到觀塘apm舉行7年以來首個DVD簽唱會，吸引過千市民圍觀，排隊簽名者也有1,000人。大會首先安排唱片公司高層頒發5隻白金唱片給Sammi，令她笑逐顏開。大會又安排兩位大隻猛男在Sammi身旁舉啞鈴，Sammi即搞笑地篤猛男的手臂肌肉。之後一班fans上台撐偶像，其中一名男fans感動到喊，Sammi見狀即攬實他安慰。
「係男友就冧死」
事後Sammi接受訪問說：「好開心DVD可以賣得咁好，真係要感謝主，如果冇唔開心同憂鬱呢一連串事發生，就冇咗病呢個學習過程，家可以發揮正能量好開心。」問到男fans灑淚台上，又對她大唱情歌，Sammi笑說：「幾好吖，可以滋潤吓。我都明白佢見到一個好鍾意同好愛嘅人會咁，如果真係男朋友就冧死，馬上『姐分』（即結婚）。」
之後Sammi繼續狂讚男fans，她說：「男人喊真係世間罕有呀，家我都係喺自己屋企淋吓水囉，有拖拍係好事，但要遇到啱嘅先得。」問Sammi有沒有約會男士，她說：「冇約會呀家，其實我要求都唔係高，都有出去食飯，奈何只能做朋友，所以如果大家影到我同男性食飯都唔使太驚慌。」
採訪、攝影：藍文浩
