鄭詩韻喺上星期四凌晨為陳鴻業生咗7磅半老虎仔Ayden，噚日正月十五元宵佳節，陳鴻業去養和醫院接老婆同囝囝出院返屋企團圓。佢哋將BB放喺嬰兒籃入面，好快手咁放上車，夫婦大方任影，鄭詩韻話：「BB仲細唔好影。」之後佢大派利是。
輪廓似老竇
返到屋企之後，陳氏伉儷發咗囝囝張相畀傳媒，囝囝輪廓似老竇，眼大大好精靈。鄭詩韻接受電話訪問，佢話囝囝已經瞓咗覺，佢自己就有啲攰，因為生咗之後，佢同老公嘅時間都係圍住個仔轉，鄭詩韻話：「佢好準時6點起身要食奶，所以我哋日日都6點起身，夜晚10點就瞓。」佢話呢隻老虎仔算易湊，只要有嘢食就得，食飽就瞓，鄭詩韻講到個仔仲甜到漏話：「仲未改到中文名呀，佢係大食老虎仔，三幾日人仔，食量係幾個月大嘅BB，要三個鐘餵一次，不過佢唔揀擇，人奶同奶粉都食，一夠鐘冇嘢食就咬嘢，好好笑，大大隻好易抱呀。」
日日影靚相
BB出院前，護士幫佢冲咗凉，媽咪要聽日先試吓幫BB冲凉，而換片重任就交畀老竇，鄭詩韻話：「Alan第一次換片，手勢都OK，以後就交畀佢做。」佢哋話會日日幫囝囝換新衫影靚相，盡情享受做爹哋媽咪嘅甜蜜時光喎！