上星期二本欄提及「青光眼日」，有讀者打電話到《蘋果》詢問，想攞多啲資料。如果係咁，請讀者不如直接打電話向志願機構聖雅各福群會搵陳炳麟經理，電話係28354321/81078324，電郵係[email protected]，相信陳經理會樂於回答。
二○一○/二○一一年財政預算案提出多項「恩惠」畀不同族群，當然仍然好多人唔滿意，譬如新大學畢業生、四無人士、夾心階層……多到數唔晒，有一位男士打電話問財政司司長：「長期病患者嘅自費藥物可否扣稅？」司長話如果種種不同藥物都可以扣稅，管理十分複雜，即係講no啦。嗰位男士嘅太太患上癌症，個個月食藥要用一萬五千元，對普通家庭嚟講，確係難頂。陳炳麟告知左丁山，聖雅各福群會知道長期病患者為不少家庭帶來沉重壓力，故此創立咗一個HealthBank「健康寶庫」，提供下列服務：（一）惠澤社群醫藥房，以優惠價錢出售部份經由醫管局轄下醫院及診所處方，而需要病患者自費的藥物。（二）藥療輔導服務計劃，有三十幾名義工藥劑師提供專業藥物知識；開辦「專科專藥教育小組」課程，如高血壓、糖尿病；舉辦「外傭藥物知識課程」，令外傭可以在家照顧體弱長者；到戶藥療輔導服務，由義工藥劑師做家訪；電提服藥服務，由義工致電家中，提醒獨居病者服藥及覆診日期。（三）贈藥治病。（四）專科專藥輔助計劃（如「燃點希望計劃」及「補血寶愛心計劃」）。（五）家居醫療用品支援計劃。（六）診病交通費支援計劃。（七）健康社區齊共創之健康講座及檢查。（八）電費助貧弱計劃，透過現金資助長期病患者因長期使用醫療器材所帶來之額外電費開支。（九）到戶理髮服務，上門為行動不便的長者及殘疾病患者提供剪髮、整理儀容服務，等佢哋心理上覺得自己有打扮，健康精神一啲。以上各種健康寶庫服務的確周到周全，係要有前線工作經驗嘅社工先至度到出嚟，並非憑空想像。不過咁，有咁多服務，經費何來？當然係要各界善心人士捐錢或參加義務工作，想要多啲資料或捐款，請搵陳炳麟。